હાલમાં ભારતમાં મોટા ભાગે લગ્ન સમારંભ તથા પાર્ટીઓમાં વેસ્ટર્ન સ્ટાઇલ બુફે ભોજન ચાલે છે પરંતુ બુફે તથા ડાઇનિંગ ટેબલ કરતા જમીન પર બેસીને જમવું એક આરોગ્ય માટે વધુ ફાયદાકારક છે. અમેરિકામાં હેલ્થ પરના એક મેગેઝિનમાં પ્રકાશિત માહિતી મુજબ જમીન પર બેસીને જમવાથી કરોડરજજુ પર શરીરનું વજન આવતુ હોવાથી શરીર આરામ અનુભવે છે.
આ ઉપરાંત માંસપેશીઓમાં ખેંચાણ ઓછું થાય છે અને બ્લડ પ્રેશર નિયંત્રણમાં રહે છે. શરીરના કોઇ ભાગમાં પેઇન થતું હોયતો પણ રાહત રહે છે. ઉભા રહીને જમવા કરતા બેસીને શાંતિથી જમવાથી પાચનક્રિયા પણ સારી રહે છે. આથી વજનમાં વધારો થતો નથી અને શરીરમાં મેદ પણ જામતો નથી. એટલું જ નહી ખોરાક માટે ડીશ તરફ ઝુકવું પડતું હોવાથી પેટના સ્નાયુને પણ સ્વભાવિક કસરત મળે છે. આજકાલ સોફા અને ડાઇનિંગ ટેબલ પર જમવાના કારણે પલાઠી વાળીને બેસવાનું ભૂલાઇ ગયું છે.
તેથી શરીરમાં થાક અને માંસ પેશીઓમાં સતત દુખાવો વધે છે. આમ ભારતમાં પહેલાના સમયમાં કોઇને ત્યાં જમવાનું આમંત્રણ મળે ત્યારે આસનપટ્ટા પર બેસાડીને જમણવાર થતો હતો. જેને ‘પંગતપ્રથા’ કહેવામાં આવતી જે વધુ સારી હોવાનું સાબીત થયું છે.
