નર્સને આપણે ભણેલા ને અંભણ સહુ sister કહેતા. Sister એટલે બ્હેન. આ કેવળ માનાર્થે સંબોંધન નથી. આપણા જીવનમાં બ્હેનનું જે સ્થાન છે, એની સાથે જોડાયેલ જે ભાવના છે એ સઘળું આ સંબોધનમાં છે. નિસ્વાર્થ સ્નેહ અટલે બ્હેન. આ પરંપરા હતી. હવે તો ભાઇઓ પણ આ ક્ષેત્રે સેવારત છે.
પાઠ્યપુસ્તકમાં ફ્લોરેન્સ નાઇટીંગલનો પાઠ આવતો. કપરાકાળમીં , જીવના જોખમે પણ દર્દીની સેવા એ જ જીવનમંત્ર એને ચરિતાર્થ કરે છે નર્સ.
સ્વસ્થ વ્યક્તિને એમના જીવન વિષે કલ્પના ન થઇ શકે. માંદગીનાં બિછાને હોય એમને પોતાનાં જીવનની રક્ષા કરનાર નર્સનો મહિમા કહેવો ન પડે. હોસ્પિટલના ઓરડામાં એ બે જણ હોય છે – ને દરવાજેકાહ જોતું જીવન કે મૃત્યુ.
નાડીના ધબકાર સાથે જોડાયેલ જીવન અને મૃત્યુને એ જેટલું નજીકથી જાણે છે એટલું કોઇ નથી જાણતું.
કોવિડકાળમાં જે પરિસ્થિતિ હતી એની યાદ માત્ર કરો તો આપોઆપ નર્સને વંદન થઇ જશે. 
દર્દની એ પ્રત્યેક ક્ષણે મન
ઝંખે શીતળ સ્પર્ષ
એવે સમયે જે પાસે રહીને પીડા હરે તે નર્સ
કદીક મુકે હાથ એ માથે
કદીક મીઠું મલકી
કદીક જોઇને હેતભર્યું
જેની આંખો રહેતી છલકી
કદીક થાતાં રુક્ષ કડક એ
વ્યક્ત કરે કદી હર્ષ
દર્દ ની ઘડીએ પાસે રહીને પીડા હરે તે નર્સ
દર્દથી ઘેરી એકલતા
એ સહેવી કપરી લાગે
એવે સમયે એ જ એકલાં
નીંદરઘેર્યું જાગે
સત્ય અને સાંત્વનાની વચ્ચે
વીતતાં જાયે વર્ષ
સુખ ને દુ:ખની વચ્ચે ઝૂલતાં મનનું નામ છે નર્સ
કોઇ ન રાખતું યાદ એમને
એય કરે ના સ્મરણ
કોઇને મળતું જીવન પાછું
કોઇને મળે મરણ
મનુષ્ય યત્ન ને કૃપા પરમની
એ જીવન આદર્શ
સેવા નામનો મંત્ર જપે છે એનું નામ છે નર્સ
– તુષાર શુક્લ
