હવે તો તું જ કહે કે શું લઉં હું આ નદીમાંથી
હવે તો તું જ કહે કે શું લઉં હું આ નદીમાંથી? તરસને કોઈ પણ કાઢી શક્યું છે માછલીમાંથી? ગયા’તા જે, થયાં વર્ષો છતાં પાછા નથી આવ્યા, ક્ષણો બેત્રણ ઉછીની લાવવા આખી સદીમાંથી. અમારી જિંદગીમાં આવશે વૈભવ ખરેખર, જો, અમે પામી શકીશું કંઈ તમારી સાદગીમાંથી. નથી મેં હાથ ઈશ્વરથી મિલાવ્યો આ જ કારણથી, ઉતારી ના શક્યો એ પણ સુદર્શન, આંગળીમાંથી. અમારા અંગનું આ સૈન્ય આજે શાંત શાને છે? થયો લાગે છે રાજા ગુમ અમારી છાવણીમાંથી. ભાવિન ગોપાણી
